வளையலோசை

மார்கழி அதிகாலையில்
ஆவி பறக்கும் தேநீராய்
உனது கோப்பையில் நிரம்புகிறது அது

கலைந்து கிடக்கும்
உனது புத்தகக் குவியலை
அடுக்கி வைத்து
ஞாயிற்றுக்கிழமையைச்
சபித்துக் கொண்டிருக்கிறது அது

ருசித்துப் பழகிய
உனது நா சுவைத்து மகிழ
சமையற் குறிப்புகளை மேய்கிறது அது

துடித்தடங்கும்
உனது இச்சையைத்
தாலாட்டி உறங்க வைக்க
படுக்கை விரிக்கிறது அது

அன்பு, அக்கறை, காதல் என
வெவ்வேறு பெயர்களில்
நீ வீசும் வலைகளில்
சிக்கிக் கொள்ளத் துடிக்கிறது அது